KALIBO, Aklan—Ginduea eon ro deklarasyon it ‘No Movement Sunday’ sa banwa it Tangalan.
Ginkumpirma ni Tangalan Mayor Gary Fuentes nga sambilog sa andang nagapangunang konsiderasyon sa pagbo-oe it No Movement Sunday hay bangud nga ginpaidaeum eon ro probinsiya it Aklan sa pinakamanaba nga quarantine classification, ro general community quarantine ukon GCQ.
Magiging epektibo sigon ro anang mandu sa maabot nga domingo nga adlaw.
Raya hay nagakahueugan suno kana nga pwede eon nga magbukas ro mga establisimnto komersiyal ag ginbo-oe eon ro mga barangay border control checkpoints.
Madumduman nga sambilog ro banwa it Tangalan sa mga nagdeklara it No Movement Sunday kaibahan ro banwa it Banga ag Malinao sa tunga it kasagsagan it grabeng pagtinaas it kaso it covid 19 sa probinsiya.
Sa sueod suno kana it limang domingo nga pagpatuman kara sa andang banwa hay mabahoe raya nga bulig agud nga mapanaba ro kaso bangud nga nalimitahan ro pagpinanaw it mga tawo.
Kadungan kara, ro anang pag apela sa publiko nga sundon sa gihapon ro basic health protocols kontra sa Covid-19 agud nga maging dere-deretso eon ro pagnaba it kaso it nasambit nga sakit sa Aklan.
Sa makaron ro banwa it Tangalan hay una sa moderate risk.
May kabilugan nga 53 nga aktibong kaso, 364 nga recovery, ag 6 ro namatay.
Gindugang pa ni mayor Fuentes nga sigidas man ro andang vaccination roll-out kada naga abot ro supply nga gintaeana kanda kun sa siin nagapahaum eon sanda para sa A5 group ukon mga indigent nga pumueuyu.
