NEWS Analysis–Pagaeauman nga mas grabe pang sitahan ag mga daeakpan sa karsada kontra sa mga behikulong owa it plaka ro igapatuman it Philippine National Police (PNP).
Kun paga-isipon, dapat hay kato pa hugut nga ginpatuman ro ‘no plate, no travel’ policy.
Kaeabanan nga nakabutang nga karatula nga ginagamit makaron nga plaka hay ‘registered, no plate available’ eabi eon sa mga motorsiklo.
Nauna eon nga ginmanduan ni PNP chief Benjamin Acorda Jr. ro Highway Patrol Group (HPG) nga hugut nga ipatuman ro nasambit nga polisiya sa plaka.
Suno kana nga owa it exempted sa paga-obrahon nga pagdakop sa mga naga-eabag maskin ro mga tawuhan mismo it pulisya.
Ginpaandaman ro mga madakpan nga pulis nga nagagamit it mga saeakyan ukon motorsiklo nga owa it plaka bangud nga magapangatubang ro mga raya sa kasong administratibo ag kriminal.
Hugut man sigon sanda nga makikipag-koordinasyon sa Land Transportation Office (LTO) para sa mas epektibong pagpatuman it ‘no plate, no travel’ drive.
Ro nasambit nga polisiya hay nakabutang sa 2015 Joint Administrative Order nga gin isyu it Department of Transportation and Communication (DOTC) ag LTO.
May nakataeanang multa nga P10,000 sa tag-ana it saeakyan ag P1,000 man sa nagamaneho kara.
Kabay nga matutukan man ro nagagamit eon man it mga commemorative plates, kaibahan ro mga bukon it awtorisadong paggamit it wangwang ag blinkers nga naga inabu eon man sa mga karsadahon .