KALIBO, Aklan—Nagpatuman it “No vaccine, No entry policy” ro mga estabilisyemento komersyal sa probinsya it Aklan umpisa makaron nga adlaw.
Raya hay kasunod it uman nga pagtaas it kaso it COVID-19 nga daea it Omicron variant.
Igapatuman ro kaparehong sueondanan sa mga restaurant, party, tourist attractions ag religious gatherings.
Base sa ginpagguwa nga bag-ong Executive Order No. 001 Series of 2022 ni Aklan Governor Florencio Miraflores ginpatag-uran eon ro operasyon it mga estabilisyemento umpisa alas-5:00 it aga-aga hasta alas-8:00 it gabi-i samtang alas-5:00 it aga-aga hasta alas-9:00 it gabi-i sa isla it Boracay.
Tuyo eamang kara nga masiguro ro kaeuwasan it publiko sa tunga it padayun nga pakikipagsukoe it nasyon sa pandemya.
Kadungan kara, naga-apela man ro gobyerno sa mga pumueoyo nga indi eon maging pasaway kamana man nga magpabakuna eon agud nga makaangkon it dugang nga proteksyon kontra sa makataeapon nga sakit.
