KALIBO, Aklan—Ginkumpirma it pamunuan it Federation of Kalibo Tricycle Operators and Drivers Association Inc. ukon FOKTODAI nga ginaplanuhan eon it Provincial Inter-Agency Task Force nga ipatuman ro “no vaccine, no ride policy”.
Ginpahayag ni FOKTODAI President Johnny Damian nga posibleng malimitahan ro pagahimuon nga transaksyon it mga pumueoyo ag driver engkaso nga ipatuman eon kapareho nga butang sa probinsya it Aklan.
Ginpasiguro ni Damian nga magasunod sanda sa anumang igapagguwa nga polisiya para maprotektahan ro kaeuwasan it publiko.
Nauna eon nga ginpatuman it Department of Transportation (DOTr) ro “no vaccine, no ride policy” sa National Capital Region (NCR) matapos nga ipadaeom sa Alert Level 3.
Samtang, plano sigon nanda nga ipatawag ro mga Chapter President sa kada barangay para masayuran ro magiging epekto kara sa andang nasakupan.
Sa pihak nga parte, nakataeana eon nga pagatalakayon sa plenary it Sangguniang Bayan it Kalibo ro may kaangtanan sa igapatuman nga fare adjustment sa mga nagabiyaheng tricycle.
Raya hay matapos ro ginpatigayun nga public hearing sa 16 nga kabarangayan it Kalibo ko mga nagtaliwan nga adlaw.
Nagaeaum si Damian nga sa rayang pamaagi hay ma-resolba eon ro problema sa tunga it mga pasahero ag tricycle driver.
Aminado man imaw nga maabu sa gihapon ro nagareklamo bangud sa overcharging.
