KALIBO, Aklan — Bangud sa paeag it 2019 novel coronavirus (nCoV), apektado makaron ro mga overseas Filipino workers (OFWs) nga nagatrabaho sa mga casino, sinehan, bars ag iba pang mga entertainment venues sa Macau.
Suno kay Bombo international correspondent Ems delos Santos it Brgy. Cabugao, Altavas, Aklan nga matsa ghost town eon makaron ro dating buhing-buhi nga gambling hub bangud sa kawad-an it mga turista.
Bangud sa temporaryong pagsuspinde sa operasyon it mga negosyo hay nagpatuman ro mga kompaniya it “No Work, No Pay” ag ginpagamit sa mga empleyado ro forced leave sa sueod it daywang dominggo.
Ko adlaw it Martes hay pormal eon sigon nga ginsuspinde ro biyahe it mga ferries pasueod ag paguwa it Macau nga eubus nga naka-apekto sa mga casino’s nga imaw ro lifeblood it ekonomiya it siyudad.
Mag-eowas sa mga casino, pilang grocery stores ag supermarkets man ro nagsarado bangud sa pagka-ubos it andang baligya kasunod it pag-panic buying it mga pumueoyo.
