KALIBO, Aklan — Nagapabilin nga tentative ro skedyul nga pangatlong dominggo it Nobyembre posibleng iga-release ro social pension it mga kwalipikadong senior citizens it banwang Kalibo.
Raya hay suno kay Muncipal Social Welfare Development Office (MSWDO) head Lolly Espino sa interview it Bombo Radyo Kalibo.
May kaangtanan kara, anang gin-engganyo ro mga social pensioner nga maghueat-hueat eon lang anay bangud maskin sanda sa munisipyo hay nagahueat man it pinal nga mando halin sa Department of Social Welfare and Development (DSWD) region 6.
Posible suno kana nga iga pay-out sa mga senior citizens ro kabilugan nga P6,000 engkaso nga may pinal eon nga komunikasyon kanda ro regional office.
Ginpahayag dugang ni Espino nga base sa pinakaulihing listahan nga ginpaguwa hay una sa 4,939 senior citizens eon lang ro kwalipikadong magbaton it social pension halin sa unang listahan nga 5,907.
Maid-id sigon raya nga ginsikyar ag ginvalidate it mga staff hasta nga nagguwa ro nasambitang numero.
Nasayuran nga kapin sa onse buean eon nga delay ro social pension it mga senior citizen it banwang Kalibo.
