KALIBO, Aklan—Normal eamang sigon nga maka-experiensiya it pagtama it buhawi makaron nga tiempo.
Raya ro ginpahayag ni Provincial Disaster Risk Reduction and Management Office (PDRRMO)-Aklan action man Galo Ibardolasa.
Ginpaathag kara nga nabilog ro tornado bangud sa pagbag-o sa direksyon it daywang hangin nga nabilog sa kahawaan ag engkaso nga ro nasambit nga daywang hangin hay owa nagabigayan hay nabibilog eon bilang tornado.
Ro termino sigon kara kon nabilog sa tubi hay ipo-ipo ag kon sa eugta hay buhawi.
Senyales sigon kon may nagapaabot nga ipo-ipo hay kun makakita it mammatus clouds ukon madamoe ag maitom nga daea-ura nga matsa cotton balls ro anang korte, apang owa sigon raya nagabuhay.
Samtang, ginlaygay ni Ibardolasa nga engkaso nga maka-experiensiya it ipo-ipo ag una sa open field, mas mayad nga mag-eubog.
Kon sa sueod it baeay, mag-agto sa basement ukon pinakamanaba nga lugar ukon sa idaeum it hagdan.
Likawan ro mga bintana nga posibleng mabasag, mag-agto sa kilid it kwarto ag takpan ro ueo gamit ro inyong alima, maggamit it madamoe nga padding bilang proteksyon engkaso nga may mahueog nga parte it kisame ag indi magpabilin sa sueod it saeakyan.
Sa pihak nga parte, nagapati si Ibardolasa nga bukon it ipo-ipo ro nagpanaeasa ko nagtaliwan nga adlaw bangud nga owa man it masyadong nahalitan mag-eowas eamang sa pagkatumba it pilang poste it Akelco. Suno kana nga thunderstorm eamang ro naeksperyensyahan.
