Naglunsar ro North Korea it panibag-ong ballistic missile sa kaeawran sa tunga it Korean peninsula ag Japan.
Raya ro ginpahayag ni Bombo International Correspondent Josel Palma it Japan nga kun siin ro nasambit nga paglunsar it panibag-ong ballistic missile hay natabo pilang oras antes ro pag-eupad paagto sa Tokyo ni South Korean President Yoon Suk Yeol para sa sangka rare summit.
Suno pa kana nga ro North Korea hay nagapatigayon it haeos adlaw-adlaw nga paglunsar it missile makaron nga dominggo sa tunga it padayon nga joint military exercises it South Korea ag US nga ginkondena it Pyongyang.
Sa pihak kara, natigayon sa gihapon ro pagtambong ni South Korean President Yoon Suk Yeol sa nasambit nga summit.
Ginpahayag dugang nga nagapati ro Japan government nga senyales it pagbaeos ro ginapatigayon nga adlaw-adlaw nga paglunsar it North Korea it sangka ballistic missile sa ginahimu nga pakigkita it Japan government sa lider it US ag South Korea.
Sa pihak nga parte, nag-agto si Yoon sa Japan para sa unang nasambit nga summit kaibahan si Prime Minister Fumio Kishida sa sueod it masobra sang dekada nga kun siin kaparte it pagpueong ro pagtinguha nga maeagpasan ro mga alitan sa pulitika, ekonomiya ag mapabaskog pa ro security defense sa tunga it daywang nasyon
