Gindeklara ro Nobiyembre 4 bilang National Day of Mourning para sa mga biktima it bagyong Kristine sa bisa it gin-isyung Proclamation No. 728 ni Pangueong Ferdinand Marcos Jr.
Sa idaeom it nasambit nga proklamasyon ag sandig sa Republic Act 8941, igapataas ro bandera it Pilipinas nga naka-half mast sa tanan nga edipisyo it gobyerno ag installations sa bilog nga nasyon ag sa abroad sa adlaw it Lunes.
Gin-isyu ro nasambit nga proklamasyon bilang pakikibuylog sa mga naulilang pamilya ag pinalangga sa kabuhi it mga namatay bangud sa pagpanaeasa it nagtaliwan nga bagyong Kristine.
Angot kara, gin-engganyo it presidente ro pumueoyong Pilipino nga maghaead it pangamuyo para sa mga namatay sa nasambit nga trahediya.
Kon madumduman, humampak sa 145 katawo ro namatay sa maeapnagong pagbaha ag landslide daea it bagyong Kristine.
May pilang mga indibidwal ro naninahan samtang may pila gihapon ro nagapabilin nga missing.
