KALIBO, Aklan–Aminado ro Numancia Integrated School nga ro kakueangan it classroom ag congestion it mga estudyante ro pila gihapon sa mga nagapangunang nga problema nga nagsug-aeaw sa andang eskwelahan sa pormal nga pagbukas it klase makaron nga adlaw it Martes.
Suno kay Mrs. Sally Agapito, principal 1 it NIS nga sa pihak it maeain nga tiempo hay nagpadayun sanda sa andang pagbukas it klase matapos nga owa man it ginpaguwa nga advisory angot sa cancellation of classes ro local government unit it Numancia.
Pila sa mga gina-ideya makaron it pamunuan it eskwelahan hay ro pagpa-obra it dugang nga mga lamesa pinaagi sa andang MOOE funds agud nga ma-akomodar ro mga estudyante.
Nagpromisa man sigon ro mga ginikanan nga sanda ro maga-provide it bangko nga may armchair para sa andang mga unga.
Ginpahayag ni Agapito nga ro kada classroom sa elementarya hay may average nga estudyante nga 35 hasta 38 apang sa junior high school hay may una nga 58 samtang sa senior high school hay 60 nga makabig nga bukon it standard.
May pilang manugturo suno kana nga haum nga magbaton it workload, apang mabahoe nga hangkat kanda ro kakueangan it classroom.
