KALIBO, Aklan–Temporaryong nagsaylo it opisina ro Numancia Municipal Police Station sa ikaywang panaegan it Numancia Public Market.
Raya hay matapos nga ginpaidaeom sa kostruksyon ro andang lumang pasilidad.
Ginpahayag ni Police Major Fidel Gentallan, Chief of Police it Numancia Municipal Police Station nga kaparte raya it pag-upgrade it mga edipisyo it kada estasyon it pulisya sa bilog nga nasyon.
Nagpanawagan man raya sa mga pumueoyo eabi eon sa mga may ginadangop nga reklamo ukon nagapangayo it police assistance nga magdiretso sa andang bag-ong pasilidad.
Sa oras sigon nga matapos ro pagtukod it modern police station hay insigida sandang magabalik sa dating pwesto.
Ginpasiguro man ni Major Gentallan nga 24/7 nga aktibo ag naka-alerto ro andang personnel sa pagresponde sa anumang emerhensiya.
Sa pihak nga parte, eubos man ro kalipay it bilog nga pwersa it Numancia PNP matapos nga makaangkon it titueo bilang Best Municipal Police Station para sa buean it Abril.
Raya hay kasunod it ginpatigayun nga Unit Performace Evaluation Report sa pagpanguna it Aklan Police Provincial Office (APPO).
Dikara sigon ginatan-aw kung paano naging operational ro sangka estasyon it pulisya.
Ginpasaeamatan man ni Major Gentallan ro anang mga kabaro bangud raya tanan hay naging posible bangud sa andang hugut nga koordinasyon ag pagtinguha nga makatao it bilog nga serbisyo.
