KALIBO, Aklan—Desidido ro Numancia Municipal Police Station nga kasuhan ro sangka babayeng vendor nga nagwala, naghana nga magpanakit it sangka pulis ag nagpangbasag it wind shield it andang patrol vehicle.
Raya hay kasunod it alegasyon it suspek nga si Emma Alejandro, 40-anyos ag residente it Brgy. San Dimas, Malinao nga naakig imaw matapos nga owa it sin-o man nga pulis ro nagsapak sa anang ginabaligya nga chicharon.
Suno kay Police Staff Sergeant Marlon del Rosario it Numancia PNP nga pagapadayunon nanda ro pagpasaka it kasong malicious mischief kontra sa babaye bangud sa gin-obra nga pagbasag sa windshield it andang patrol car gamit ro sangka mabahoe nga bato kamana man rohana nga pag eampos it bote sa andang kaibahan nga pulis nga nagpamalibad eon nga magpahingaean.
Ginasugid nga ro suspek hay may sakit nga epilepsy ukon kueo ag nagawala kon gina-atake it anang baeatian.
Suno kay Alejandro nga tumandok it Iloilo ag nakapangasawa it taga-Malinao may kahigayunan nga gin-gapos imaw it andang mga opisyal it barangay bangud sa anang pagwala ag ginapakulong sa Malinao PNP.
Aminado man ro suspek nga ko gabi-i antes ro insidente hay nagwala man imaw sa andang baeay matapos nga sumpungon it anang sakit.
Imaw eamang sigon ro nagapangita rason nga maskin may sakit hay nagalibod it anang baligya nga chicharon.
