KALIBO, Aklan—Nagapadayon ro imbestigasyon it Numancia Municipal Police Station sa gina-alegar nga pag-eumpat it sangka eaeaki sa Kalibo-Numancia bridge sa parte it Brgy. Bulwang, Numancia nga gintunaan it anang kamatayon.
Suno kay Johndel Simeon, sambilog sa mga nakasaksi ag nag-rescue sa owa pa nakilaea nga eaeaki nga pasado ala-1:00 kaina it aga-aga samtang naga-inuman sanda it anang mga kabarkada nga nataeupangdan nanda ro biktima nga pabalik-balik sa nasambit nga tulay.
Nakibot sigon sanda kat gulpi raya nga nag-eumpat.
Matapos nga makita nga nagakapay-kapay sa tubi, ginbuligan nanda raya kaibahan ro tatlong iba pa nga mahaw-as sa tubi.
Posible sigon nga may problema ukon nakakaexperiensiya it depression ro eaeaki rason nga nag-eumpat sa tulay.
Narekober sa tulay ro anang wallet nga may sueod nga kapin sa P300 pesos.
Gindugang pa ni Simeon nga sanda eon lang ro nagdaea sa biktima sa Aklan provincial hospital, apang gindeklara raya nga dead on arrival.
Gintinguhaan pa nanda raya nga eowason pinaagi sa CPR apang owa eon raya nasarangan.
Ro biktima hay ginaboebanta nga naga edad it 25 anyos ag nakasuksok it maong nga saewae ag naka long sleeve ag rubber shoes kat matabu ro insidente.
