KALIBO, Aklan—Nagapadayun makarun ro ginahimo nga hot pursuit operation it Numancia PNP kontra suspek nga nagbuno-patay sa sangka binatilyo mga bandang alas-8:15 it gabi-i sa banwa it Numancia.
Ro biktima hay ginkilaea kay Jero Hapin, 13-anyos ag residente it Brgy. Bulwang, Numancia samtang ro suspek hay ginkilaea man kay Joel Francisco, 18 anyos ag residente it Barangay Camanci Sur sa nasambitan nga banwa.
Suno kay PCMS Lerlyn Roberto it Numancia PNP nga nagpagtripingan eamang it grupo it suspek ro biktima hasta nga nag-abot sa punto nga nabun-an raya ag nadueaan gid it hueam nga kinabuhi.
Samtang, ginsaysay man it magueang it biktima nga si John-nel Begalan nga antes ro insidente hay ginsugo sigon nanda ro biktima nga magbakae it ice kaibahan si certain “cedrick”.
Makataliwan ro pilang minuto hay nagtawag sigon ro biktima nga nakursunadahan imaw sa daean it mga grupo it kaeaeakin-an.
Bangud kara hay gin-adtunan sigon nanda ro biktima ag dikato may nagpatunga nga komosiyon sa magtimbang nga parte.
Hasta nga ko ulihi hay napan-uhan eamang nanda ro biktima nga may tama eun it pagbuno ag nagahamyangon eun sa eugta.
Samtang, ginbasoe man it pamilya it biktima ro mga barangay tanod bangud sa mabuhay nga aksiyon agud nga madaea sa ospital ro biktma.
Sa pihak nga parte, ginpahayag man ni Leonilyn Timtiman, barangay tanod it Brgy.Camanci Sur, Numancia nga matapos nandang mabatian nga may kinagamo sa nasambitan nga lugar hay gilayon nanda sanda nga nagresponde.
Dugang pa kara nga sa andang pag-abot sa lugar hay gintapna nanda ro komosiyon.
Apang sa anang pagtalikod hay nakibot eamang imaw nga may nagasinggit angot sa pagkabuno sa biktima.
Ginklaro man kara nga gilayon nanda nga gintatap ro biktima ag gindaea sa ospital gamit ro anang personal nga tricycle.
Apang ko ulihi ha gindeklara man nga dead on arrival it nagtatap nga doktor ro nasambitan nga biktima.
Samtang, kabaliktaran ro naging pahayag it nanay it suspek nga si Joel Francisco sa naging sentenmiyento it pamilya it biktima.
Suno kana nga naga-eubog sigon ro anang mga unga kat gingubat it mga kaibahan it biktima.
Samtang owa man sigon imaw ideya kung matood nga ro anang unga ro nakabuno sa nasambitan nga biktima bangud sa maabo man ro naka-engkwentro kara.
