KALIBO, Aklan—Gin engganyo ni P/Maj. Fidel Gentallan, hepe it Numancia Municipal Police Station si Rogie Franco, ro nabilin ag sambilog pang may kaangtanan sa kasong pagpatay sa tricycle driver nga si Wilfredo Tamayo, Jr. nga magsurender eon agud nga masayuran ro anang partisipasyon sa krimen ag makadaeagan eon ro andang kaso.
Suno kay major Gentallan nga sa ngaean nga may warrant of arrest eon imaw sa kaso hay maskin siin pa imaw magpanago hay mabahoe ro posibilidad nga madakpan imaw it mga otoridad.
Kapareho it naarestong si Jomar Palacios alyas Joker Palacios, si Franco hay nagapangatubang man sa kasong murder.
Madumduman nga bandang alas-3:20 hapon it Huwebes hay naaresto si Palacios samtang una sa waiting shed sa Brgy. Tabangka, Numancia gamit ro warrant of arrest kontra kana.
Owa man sigon raya naghana nga magsukoe sa mga otoridad ag matawhay nga nagsunod sa andang imbitasyon sa estasyon it pulisya.
Sanday Franco ag Palacios hay magkaibahan nga nagpaeagiw matapos nga mahimo ro krimen ko Nobyembre 27, 2021 sa Brgy. Camanci Norte, Numancia.
