KALIBO, Aklan—Owa it anuman nga violators nga nailista ro Numancia Municipal Police Station sa pagpatigayon nanda it Commission on Elections ukon Comelec checkpoints.
Suno kay P/Capt. Maricel Guevarra, hepe it Numancia PNP Station nga maskin nga magaoy apang kada weekends hay haeos 24 oras sanda nga nagapatigayon it regular ag Comelec checkpoints ag kon weekdays hay haeos daywang oras.
Owa pa sigon sanda it may nadakpan nga nagadaea it baril ukon deadly weapon.
Nagapabilin nga matawhay suno kana ro banwa it Numancia bangud nga ko nagtaliwan nga eleksyon hay owa man sanda it may na-monitor nga election related-incidents ag nagaeaum nga magadere-deretso raya hasta sa maabot nga barangay ag sangguniang kabataan elections.
Kadungan kara, nagpanawagan si P/Capt. Guevarra sa mga indibidwal nga nagahupot it bukon it lisensiyadong baril ukon nag-expire nga lisensiya nga isurender eon sa pinakamaeapit nga estasyon it pulisya ukon makipag angot sa kapulisan agud nga sanda ro maga-agto sa inyong panimaeay.
Raya hay sa idaeum suno kana it andang nagapadayun nga programa nga ‘tokhang kontra armas luthang’.
