Kalibo Aklan——–Amat amat eon nga nagataas ro numero it mga senior citizen ukon mga una sa A2 priority nga gustong magpabakuna sa Barangay Estancia, Kalibo.
Raya ro ginpahayag ni Punong Barangay Daisy Andrade it nasambit nga lugar matapos ro matiyaga nga pag-engganyo kanda it konseho nga magpabakuna eon kontra COVID-19 para sa andang proteksiyon.
Ginpahayag dugang nga naging halimbawa man sanda nga mga opisyal eabi eon imaw nga fully vaccinated eon matapos nga makabaton it ikaywang dose.
Kat makita sigon it anang mga nasakupan nga nagpabakuna sanda hay maabu ro nagpahayag it interes nga uman nga maga-fill-up it form nga nagapabor eon sanda nga magpaturok.
Nagaeaum man si Punong Barangay Andrade nga mas maabu pa nga bakuna ro magaabot sa banwa it Kalibo agud nga magiging dere-deretso ro pagbakuna sa anang mga constitudents nga gustong makaangkon it proteksyon kontra sa deadly virus .
Sa pihak nga parte, gindugang pa kara nga hugut nanda nga ginapatuman sa andang Barangay ro Executive Order ni Mayor Emerson Lachica nga nagalimita sa mga mass gathering matapos nga nakalista eon man sanda it 2 nga bag-ong kumpirmadong kaso nga sangka mag ama nga ginasugid nga nagpatigayon it birthday party.
Nasayuran nga ro Estancia ro ikaywang Barangay sa Kalibo nga may pinakamataas nga kaso it COVID-19.
