Umabot eon sa masobra 7,600 ro numero it mga Overseas Filipino Workers (OFW) ag andang mga pamilya nga eowas nga nakauli sa Pilipinas sa tunga it nagapadayon nga tensyon sa Middle East kasunod it pag-abot it panibag-ong batch it mga Pilipino halin sa Kuwait.
Suno sa Department of Migrant Workers (DMW), kapin sa 196 nga mga OFW halin sa Kuwait ro madinaeag-aon nga naiuli sa nasyon sakay it sangka commercial flight.
Ro nasambit nga tikang hay kaparte it mas ginpabaskog nga repatriation efforts it gobyerno nasyonal para ipaeayo sa peligro ro mga Pilipinong apektado it kinagamo sa rehiyon.
Samtang, insigidang ginsug-aeaw it mga representante it ahensya ro mga nag-uli naton nga kababayan.
Ginpasiguro it DMW nga ro kada isaea kanda hay mataw-an it bulig pinansyal, libreng transportasyon pauli sa andang mga probinsya, ag temporaryong madayunan.
