KALIBO, Aklan—Naga-abot eon sa kapin sa 6,559 ro numero it mga naduea-an it trabaho sa probinsiya it Aklan kadungan it COVID-19 pandemic.
Suno kay Department of Labor and Employment ukon DOLE-Aklan Field Office Head Joselito Dela Banda nga raya hay base sa Regular Job Displacement Monitoring Report nga ginpaguwa it DOLE-aklan nga nagtipon it datos umpisa Enero hasta katapusan it Hunyo.
Gindugang pa ni Dela banda nga naghalin ro mga nasambit nga naduea-an it trabaho halin sa 178 nga establisimyento ukon kompanya nga nag-file it temporaryo closure samtang ro iba hay eubusan nga nagsarado.
Gindugang pa it taeatapan nga maabu ro naduea-an it trabaho umpisa nga magtuhaw ro pandemya partikular sa isla it Boracay.
Kaeabanan suno kana kara hay naapektuhan it retrenchment ukon pagbawas it kapin sa 709 nga mga trabahador halin sa 66 nga establisimento samtang ro iba hay bangud sa permanenteng nagsarado ro andang mga gintrabahuhan nga naga-abot sa waeo nga may 34 nga workers.
Samtang, kapin sa 282 nga establisimento ro nagapatigayon it ginkasugtan nga work arrangements kun sa siin eakot kara ro kapin sa 6,319 nga trabahador nga naga-duty it tatlo hasta ap-at nga adlaw sa sang domingo.
Sa datos it DOLE, pinakamaabung naduea-an it trabaho hay halin sa banwa it Kalibo ag Boracay.
Ginbase it DOLE ro datos sa notices of shutdown and retrenchment nga ginsumite it mga employer.
Ginpahayag pa ni Dela banda nga naapektuhan ro mga negosyo bangud sa mga restrictions nga ginapatuman agud nga makontrol ro pagkalhit it COVID-19.
Pila suno kana sa mga bulig nga ginatanyag it taeatapan hay ro TUPAD ukon tulong panghanapbuhay sa ating mga displaced at disadvantaged nga mga workers ag ro livelihood projects kun sa siin sigidas ro andang pag-release it cheke sa mga nagkaeain-eain nga banwa nga naga-abot sa masobra sa 16 milyon pesos umpisa enero hasta hunyo para sa TUPAD ag ro livelihood program hay kapin sa 1.5 milyon pesos.
