Kasunod it sigidas nga pagdinugang it numero it mga nagpositibo nga baboy sa African Swine Fever ukon ASF sa probinsya it Aklan, hay ro hugot man nga pagtutok it mga brgy. Officials sa mga alagang baboy nga sakop it andang hurisdiksiyon.
Insigida nga ginapabue-an it blood samples ro mga alagang baboy sa tiempo nga nagapakita raya it sintomas it ASF virus.
Raya ro ginpahayag ni Punong Barangay Nereo Fernandez it Brgy. Mabilo, New Washington matapos nga makalista sanda it andang kauna-unahang kaso it nasambit nga masakit it mga baboy.
Suno kana nagpatigayon eagi sanda it insigidang aksyon ag ginreport sa Department of Agriculture kat ro baboy nga nagpakita it nasambit nga mga sintomas hay namatay.
Hugot sigon sanda makaron nga nagabantay sa andang nasakupan agud nga engkaso nga may mataeupangdan nga problema hay insigidang matapna.
Sa makaron, sumaka eon sa pitong banwa sa probinsya it Aklan ro kumpirmadong infected it African Swine Fever.
Raya hay ginakaeakipan it Balete, Batan, Tangalan, Makato, Numancia, Kalibo ag New Washington.
