KALIBO, Aklan—Nabawasan ro numero it mga pasaherong nagasakay sa motorbanca paagto sa isla it Boracay makaron nga buean it Disyembre.
Sa datos it Philippine Coast Guard (PCG)-Caticlan umpisa Disyembre 1 hasta 19, kapin sa 6,385 eamang nga pasahero ro nailista sa Caticlan ag Tabon ports.
Manaba raya it 95% kumpara sa masobra sa 150,000 nga bisita sa kaparehong tiempo ko nagtaliwan nga dag-on.
Suno kay Chief Petty Officer Jackie Lou Ang it PCG-Caticlan, posibleng raya hay bangud sa padayun nga paeag it coronavirus disease 2019 (COVID-19) pandemic.
Ginpasiguro man ni Ang nga hugut nga ginapatuman ro basic health protocols kapareho it pagsuksok it facemasks ag face shields antes ro pagbiyahe it mga turista patabok sa Boracay ukon pabalik it mainland Malay kamana man ro pag-disinfect sa mga pampublikong transportasyon.
Nauna kara, nagpaguwa si Malay acting mayor Frolibar Bautista it Executive Order No. 56 ko Disyembre 21 nga obligado ro tanan nga mga residente ag turista nga magsuksok it full-coverage face shields kaibahan ro facemasks kon magaguwa it andang mga baeay ag hotels.
