KALIBO, Aklan–Nagnaba ro numero it mga pasahero nga naga-abot sa Kalibo International Airport.
Raya ro ginkumpirma ni Engr. Eusebio Monserate Jr., manager it Civil Aviation Authority of the Philippines ukon CAAP Aklan matapos ro ginpaguwa nga advisory it Inter-Agency Task Force on Emerging Infectious Disease (IATF-EID) ko adlaw it Martes nga temporaryo nga nagapapundo sa pagpa-uli it mga locally stranded individuals (LSIs) sa bilog nga Western Visayas.
Ginhalimbawa kara ro sangka flight nga nag-abot nga 11 eamang ro sakay nga pasahero nga ginaeakipan it returning overseas Filipinos (ROFs) ag Authorized Persons Outside Residence (APOR).
Sa makaron hay padayun sigon nanda nga ginasunod ro executive order ni Governor Florencio Miraflores nga sangka flight eamang kada adlaw ro ginapasugtan nga makabiyahe sa Kalibo airport.
Ginpahayag dugang ni Engr. Monserate nga bangud sa nasambit nga advisory, pila sigon sa mga airline companies hay nagpadaea eon kanda it abiso nga magakansela it andang flights sa masunod nga mga inadlaw bangud sa pagkalugi.
Kat ginapasugtan pa sigon ro pag uli it mga LSIs, ro mga pasahero sa kada flight hay naga-average sa 50.
Hugot man sigon nga gina-usisa ro mga documentary requirements it mga pasahero antes nga pasakyon sa eroplano.
