KALIBO, Aklan—Aminado ro pamunuan it Kalibo International Airport nga mabahoe ro gin naba it tourist arrival kasunod it nagapadayon nga paeag it Novel Coronavirus sa probinsya it Aklan.
Suno kay Civil Aviation Authority of the Philippines (CAAP)-Aklan manager Engr. Eusebio Monserate Jr. nga ro pinakaulihi nga byahe kahapon halin sa ibang probinsya it China hay daywang ka pasahero eamang ro sakay it sangka eroplano.
Raya hay kasunod it pagsuspinde it byahe maghalin sa Wuhan ag Hubei province sa mainland China.
Sa pihak kara, mas mayad suno kay Monserate nga magsakripisyo it sangkiri ro ekonomiya it probinsya ag bilog nga nasyon kaysa nga madugangan pa ro unang kumpirmadong kaso it 2019 N-CoV.
Umpisa sa Pebrero uno hay igapatuman eon it tanan nga airline companies ro andang suspension flights maghalin sa bilog nga China hasta nga inde humupa ro outbreak it sakit sa kahadlok nga matapnan ro andang mga crew kamana man ginaeauman eon nga uwa it pasahero nga maga-adto ag magahalin sa nasambitang nasyon.
Sa makaron suno kana hay doble ro andang pagmonitor kaibahan ro Bureau of Quarantine agud nga masiguro nga uwa it makaeosot nga Chinese nationals nga carrier it nasambitang virus.
Samtang, ginklaro kara nga uwa it epekto ro ibang international flights kaparehas it Korea ag iba pang nasyon.
