KALIBO, Aklan—Amat-amat eon nga nagataas ro numero it mga turistang nagabisita sa isla it Boracay.
Suno kay Malay Tourism Officer Mr. Felix Delos Santos, nakalista sanda it kapin sa 15, 307 nga mga indibidwal nga nagsueod sa isla umpisa Disyembre 1 hasta 31, 2020.
Apang, mas manaba sigon raya it haeos 90% kung igakumpara sa kaparehong tyempo ko dag-on 2019 kung siin nakalista sanda it 152, 354 nga turista.
Nagapati man si Delos Santos nga mabahoe ro naging epekto it pandemya sa turismo eabi eon sa Boracay.
Sa pihak kara, nagaeaum man sigon imaw nga mas pang magataas ro numero sa pagtaliwan it mga inadlaw kamana man nga positibo rayang mapasugtan ro pagbukas it isla sa International tourist.
Base sa andang datus, nagapanguna ro National Capital Region (NCR) sa may pinakamaabo nga numero nga nagbisita sa isla.
Owa man sigon it pagbag-o sa mga ginapatuman nga health and safety protocols rason nga gina-engganyo kara ro publiko nga magbakasyon sa Boracay.
