Hakibot sigon si Christine Roto nga may nagpukaw kana ag gapabulig sa sangka ina nga naga-unga.
Raya ro pahayag it nursing student nga insigida nga nagresponde sa nasambit nga emerhensiya.
Suno kay Roto nga uwa man imaw nagduha-duha sa pagbulig sa nagakinahang-ean bilang sangka nursing student.
Natun-an sigon nana kung ano ag paano ro mga ubrahon ag mga proseso bangud sa turo man kana ku andang mga clinical instructors sa sangka pribado nga eskwelahan sa banwa it Kalibo kung siin nga naging euwas man ro mag-ina.
Pagsaysay man nana nga okay eun kana ro pagpasaeamat eamang halin sa pamilya nga anang habuligan.
Suno kay Roto nga ro anang tiya ag mga ginikanan ro nag-tueod kana nga magbueo it Bachelor of Science in Nursing.
Malipayon sigon imaw nga nakabulig imaw sa mag-ina ag gapasaeamat man imaw sa Diyos.
Pagsugid pa nana nga may award sigon ro anang eskwelahan nga gintao kana para iapresyar ro anang inubra.
Padumdom man nana sa mga nagahandum nga maging registered nurse nga magpadayon eang bangud nga sa ulihi hay magiging worth it gid ro andang kabudllay.
