KALIBO, Aklan–Nakataeana nga magpatigayun it Inauguration ag Oath taking Ceremony si incoming Kalibo Mayor Juris Bautista Sucro pasado alas-5:00 makaron nga hapon sa Kalibo Pastra Park.
Suno kay Kagawad Mark Sy it Brgy. Poblacion, Kalibo, ro programa hay ginpangunahan it misa pasado alas-7:30 it agahon sa St. John the Baptist Cathedral.
Ro seremonya hay ginatantya nga magabuhay eamang it hasta sang oras.
Pila sa mga ginaeauman nga magatambong sa event ro mga department heads ag division chief it munisipyo, miyembro it Sangguniang Bayan, bise alkalde ag mga supporters ni Mayor-elect Sucro.
Mag-euwas kara, imbitado man ro daywang ka mga kongresista it Aklan halin sa una ag ikaywang distrito kamana man si Outgoing Governor Florencio Miraflores ag incoming Governor Joen Miraflores, Vice Governor Reynaldo Quimpo, mga Sangguniang Panlalawigan member ag ro 16 nga mga alkalde.
May ginprepara man sigon sanda nga 1,500 food packs para sa mga tumaean-aw.
Sa pihak nga parte, matapos ro inagurasyon hay paga-umpisahan man ro gin-organisa nga foam party ni Mayor-elect Sucro.
Tuyo kara nga mataw-an it kahigayunan ro mga pumueoyo nga magkinasadya ag pagpasaeamat sa gintao kana nga mainit nga suporta it mga Kalibonhon.
Pila sa mga gina-ekspektar nga mag-perform ro dating vocalista it bandang River Maya nga si Jason Fernandez, Laraza band, sangka komedyante halin sa Manila ag DJ halin sa Iloilo.
