Obligahon it Commission on Elections (Comelec) ro mga kandidato, napierde man ukon nagdaog nga magbayad it tax sa owa nanda nagastos nga campaign funds.
Mabahoe ro maibulig it igabayad nga tax sa nasyon.
Sa advisory it Bureau of Internal Revenue (BIR), tanan nga kandidato, mapa-local man ukon national, hay dapat mag-file it statements of conrtributions and expenditures (SOCE) sa Comelec sa sueod it 30 diyas makataliwan ro Mayo 9 nga ginpatigyon nga elections.
Nakabaehag sa SOCE ro kantidad it kwarta nga nabaton it kandidato halin sa kontribusyon ag donors ag ro kantidad it nagastos para sa advertisement ag sorties sa tiempo it pagpangampanya.
Suno sa BIR, ro campaign funds hay bukon it kaibahan sa taxable income it kandidato bangud nga raya hay para eamang sa electoral purposes.
Maabu nga kandidato ro nagbaton it kontribusyon ag donasyon halin sa mga kompanya, amigo, kakilaaa ag kun sin-o sin-o pa ag bukon man it tanan hay nagastos sa kampanya.
Raya ro nagakadapat nga bayaran it tax.
Kaeabanan nga nagasobra it milyong piso ro campaign funds. Kun ro kada kandidato hay may sobrang P1 milyon pesos nga campaign funds, mabahoe man ro tax para kara ag dugang sa kaban it nasyon.
Maskin si President Duterte hay aminado nga ko 2017 hay may una imaw nga nabilin nga P3.5 milyon pesos nga excess campaign funds ko 2016.
Gindeklara sigon nana raya nga income ag ginbayaran ro tax kara.
Maskin si Manila mayor ag nagpadaeagan nga presidente Isko Moreno hay nag aku man nga may anang nabilin nga P50 milyon pesos nga owa nana nagamit ko 2016 kat magpadaeagan nga senador.
Donasyon sigon raya kana it nagkaeain-eain nga tawo.
Gindeklara nana raya nga income ag ginbayaran ro tax.
Pabaskugon pa it BIR ro pagsukot sa mga kandidato angot sa owa nagastos nga campaign funds.
Kon masukot ro nagakaigo nga buwis para sa mga raya, mabahoe nga bulig sa kaban it nasyon.
Obligahon ro mga kandidato nga magbayad ukon magboluntaryo ro mga kandidato sa pagbayad ag indi eon kinahangean nga padumdumon pa.
