Ginsuportahan ni Office of Civil Defense (OCD) Region VI Director Raul Fernandez ro panawagan ni Pangueong Ferdinand Marcos Jr., nga mag-tipon it tubi-uean ro mga pumueuyu ag komunidad bilang pagpahaum sa ginaeauman nga epekto it Very Strong El Niño hasta sa unang katunga it 2027.
Suno kay Fernandez, importanteng tikang ro pag-tipon it tubi-uean agud nga makabulig nga malikawan ro kakueangan sa suplay it tubi sa tiempo it grabeng tigmaeaea.
Sa makaron suno kana hay padayun pa nga nakaka-eksperyensiya it mga pag-uean ro pilang mga probinsiya sa Western Visayas.
Dugang pa nana nga bilang kaparte it pagpahaum sa Region VI, nakipagpueong eon ro anang taeatapan sa mga lokal nga gobyerno ag natungdan nga ahensiya agud nga usisaon ro andang kahauman ag engganyuhon ro pagbilog it mga lokal nga El Niño task force.
Ginkumbinyo man nana ro mga lokal nga gobyerno nga magpatigayon it pag-usisa sa mga kabarangayan, eabi eon sa suplay it tubi, agrikultura ag ikamayad nga eawas ag magbilog it mga contingency plan agud nga mabawasan ro epekto it mabuhay nga tigmaeaea.
Samtang, ginpasaka eon it Office of Civil Defense, pinaagi sa Regional Disaster Risk Reduction and Management Council-6, ro alert status sa Western Visayas halin sa White Alert paagto sa Blue Alert bilang pagpahaum sa naga-grabeng epekto it El Niño.
Bangud kara, gina engganyo man ro publiko nga magtipid sa tubi ag kuryente ag magpabilin nga nakasubaybay sa mga abiso it andang natungdan nga mga Municipal Disaster Risk Reduction and Management Office.
Ginaeauman sigon nga mabatyagan ro pinaka-grabeng epekto it tigmaeaea umpisa Disyembre hasta Pebrero ukon Marso, nga posibleng magpadayun hasta sa Mayo.
