Hugot ro pag-engganyo makaron it Office of the Municipal Agriculture sa banwa it Kalibo sa mga mangunguma nga ipa-insured ro andang mga pananom ukon alagang sapat agud nga makabaton it assistance halin sa gobyerno engkaso nga makaangkon it kalamidad ag sambilog sanda sa mga apektado.
Suno kay Uriel Las Piñas, Municipal Agricultural Officer it LGU Kalibo nga uwa man it may naila nga maging failure ro pagpananom ukon pag-alaga it sapat it kada mangunguma apang mas makapamayad kon ibutang nanda raya sa sigurado.
Raya hay kasunod sa pagbaton it indemnity cheque it kapin sa 100 nga mangunguma halin sa Philippine Crop Insurance Corporation ukon PCIC.
Ginpaathag ni Las Piñas nga dapat nakarehistro anay sanda sa Registry System for Basic Sectors in Agriculture ukon RSBSA it Department of Agriculture bangud nga sambilog raya sa nagapamatuod nga lehitimo ag kwalipikado sandang mangunguma para makapa-insured it andang pananom ukon mga alagang sapat.
Mabahoe suno kay Las Piñas nga bulig sa mga mangunguma ro assistance nga igata-o it gobyerno para makabangon it uman ro andang pangabuhian.
