Office of the Municipal Agriculture it Kalibo, positibo nga makapasar sanda sa aplikasyon para maging double A standard ro andang slaughterhouse

KALIBO, Aklan–Positibo ro pamunuan it Office of the Municipal Agriculture sa banwa it Kalibo nga makapasar sanda sa aplikasyon para maging double A standard ro andang slaughterhouse.

Ginpahayag ni Municipal Agricultural Officer Uriel Las Piñas nga nagpatigayun it follow up inspection ro National Meat Inspection Service (NMIS)-VI ko Hulyo 13.

Raya hay matapos nga may mapuna sanda nga pilang kakueangan sa una nanda nga pagbisita.

Sambilog sigon sa andang gintutukan hay ro pag-improbar sa entrance ag exit.

Sa oras sigon nga ma-accredit ro andang aplikasyon, eauman eon ro mas strikto nga pagpadaeagan it slaughterhouse.

Tuyo kara nga masigurong euwas ag malimpyo ro karne nga ginadaea it mga meat traders antes raya ibaligya sa merkado.