KALIBO, Aklan—Gin-engganyo it Office of the Provincial Agriculturist ro mga mangunguma sa bilog nga probinsya it Aklan nga magparehistro sa pinakamaeapit nga Municipal Agriculturist Office sa andang lugar.
Suno kay Salome David OIC Provincial Agriculturist sa probinsya it Aklan nga haeos daywang dag-on eun nga nagapatigayon it registration ro Department of agriculture ukon DA.
Apang maabo sa gihapon ro mga mangunguma nga owa pa naka-rehistro.
Dugang pa kara nga agud marehistro ro sangka mangunguma kinahangean eamang nga mag-fill up it pilang ka mga impormasyon nga ginapangayo it ahensya.
Libre man raya ag owa it pagabayaran ro gustong maging miyembro.
Madumduman nga kapin sa 124 nga mga accredited famers associations ro nataw-an it mga farm machineries it Office of the Provincial Agriculturist ko mga nagtaliwan ngabuean.
Ro mga makinarya hay gintao sa 17 nga kabanwahanan it probinsya it Aklan agud nga makabulig sa pagpanguma ukon paeangitan-an it mga local farmers sa tunga it COVID-19 pandemic.
Ro nasambit nga makinarya hay nagakahaeaga it 18.5 million pesos.
Kaibahan sa mga nakabaton hay ro sector it Rice, Corn ag Vegetable farmers.
Bangud kara, ginaeauman man it taeatapan nga pinaagi sa bulig it makinarya hay magataas pa ro ani it mga mangunguma.
Nasayuran nga sambilog ro sector it mga mangunguma nga apektado it pandemya rason nga ginataw-an raya it igtueopangod it Department of Agriculture.
