KALIBO, Aklan–Presenteng nagapatigayon it pag-usisa ro Office of the Provincial Agriculturists sa mga mangunguma nga naapektuhan it mga pagbaha ko nagtaliwan nga adlaw it sabado sa probinsiya it Aklan bangud sa pagpanaeasa it Low Pressure Area ukon LPA.
Suno kay Ms. Salome David, OIC it Office of the Provincial Agriculturists nga nagahueag eon ro mga technician it natungdan nga office of the municipal agriculturists agud nga matumod ro mga apektadong mangunguma ag ma-assess ro kahalitan it andang mga pananum.
Dapat suno kana nga detalyado ro damage assessment report nga igasumite kanda agud nga owa it mangunguma nga maitsapwera.
Ginpasiguro man kara nga may buffer stock sanda it mga binhi it paeay ag iba pang mga vegetable seeds nga pwedeng maipanupod sa mga mangungumang nagakinahangean.
Sa pihak nga parte, uman nga gin engganyo ni David ro mga mangunguma sa Aklan nga ipa-insured ro andang mga pananum sa Philippine Crop Insurance Corporation ukon PCIC agud nga mabawi ro pila sa andang mga gin-kapital engkaso nga may kalamidad nga magatama.
Mag-eowas kara, ginakumbinyo man nanda ro mga raya nga magpa-rehistro sa Registry System For Basic Sectors Agriculture ukon RSBSA.
Raya sigon ro gina-obra nga baeasihan ag guidelines it Department of Agriculture sa pagtau it ayuda sa mga farmers, kapareho it bulig pinansiyal ag insurance.
