KALIBO, Aklan—Matapos nga pormal eon nga ginpahayag it Tibyog Aklan ro andang opisyal nga kandidato para sa nagahilapit nga 2022 local and national elections, nakataeana man nga igapahayag it oposisyon ro andang official line-up.
Apang suno kay SP member Atty. Nolly Sodusta nga owa pa it petsa kon hin-uno raya matabu bangud nga may kinahangean pa nga paga-ayuson.
Haeos kompleto eon man sigon ro andang listahan ag maabu pa ro nagpahayag it interes apang indi eon nanda ma-akomodar.
Samtang, ginkumpirma ni Atty. Sodusta nga mabahoe ro posibilidad nga kanda magasueod ro negosyanteng si Audric Villar nga first time magasabak sa pulitika bilang mayor it Banga.
Mag-eowas kana, sigidas man ro pakikipagpueong kanda ni Batan mayor Rodel Ramos nga matunog nga magakandidato bilang kongresista sa unang distrito samtang nagaduha-duha pa si dating Makato mayor Jun Legazpi sa ikaywang distrito.
Makabig nga reserved candidate nanda sa pagka kongresista si SP member Atty. Harry Sucgang.
Sigurado man nga makaibahan sa line-up nanda it SP sa unang distrito hay si Atty. Axel Gonzales, New Washington SB member Raul Sucgang, dating Akelco general manager Chito Peralta, dating Banga vice mayor Pier Teodosio ag Ramy Panagsagan.
Nasayuran nga kasado eon ro tandem nanday dating Kalibo mayor William Lachica bilang gobernador ag Atty. Sodusta bilang bise gobernador nga maka engkwentru sanday Ibajay mayor Joen Miraflores ag incumbent vice governor Reynaldo “Boy” Quimpo.
