KALIBO, Aklan — Pamatyagan it sangka overseas Filipino worker nga matsa nabunutan it tunok sa anang dughan matapos nga eowas nga naka-uli sa Pilipinas halin sa Lebanon.
Sa interview it Bombo Radyo, ginpahayag ni Maria Teresa Bernabe Almadra nga halin sa masobra sa 1,000 nga mga Pinoy nga nagpahayag it interes nga ma-repatriate bangud sa nagataas nga tensyon sa nasambit nga nasyon, maswerteng kaibahan imaw sa 356 nga mga indibidwal nga naka-uli sa Pilipinas ko kan-o eamang.
Nagdesisyon sigon imaw nga aywan ro anang trabaho sa sueod eon it masobra sa an-um nga dag-on matapos nga may ginbombahan nga lugar sa Beirut nga maeapit sa baeay it anang employer.
Sa pihak kara, ginpahayag ni Almadra nga maabu pa nga Filipino ro bukon it masyadong interesado nga magguwa sa Lebanon sa pihak it mabaskog nga panawagan it Philippine Embassy.
Sa kamatuoran suno kana hay nagpaguwa eon it advisory ro embahada sa mga Filipino nga magguwa eon it nasambit nga nasyon samtang nagapabilin nga bukas ro mga paeoparan sa tunga it tensyon halin sa Hezbollah ag Israel.
Delikado suno kana ro mga Pinoy nga nagabilin sa southern portion it Lebanon bangud sa mga kinagamo.
Samtang gintaw-an sigon sanda it tig-200 dollars sa pag-uli sa nasyon ag pag-abot sa Pilipinas hay nagtau man it bulig ro OWWA, Department of Migrant Workers, ag DSWD.
Plano ni Almadra nga tumandok it Dumalag, Capiz nga magpahuway anay ag pagkataliwan it sang buean hay uman nga maga-apply bilang OFW.
Kinahangean sigon nana nga kumayod agud nga masabat ro kinahangeanon it anang mga unga bilang sangka single parent.
