Kalibo Aklan —–Nagpabulig sa Bombo Radyo ro sangka Overseas Filipino Worker (OFW) sa Jeddah, Saudi Arabia matapos nga nagpositibo sa Coronavirus infectious disease (COVID-19) kon sa siin uwa sigon sanda ginataw-i it inugtaeopangod it andang kumpanya ag health authorities.
Suno kay Lance De Leon, tubong 1233 Oroquieta St. Sta. Cruz, Manila apang presenteng nagatrabaho bilang computer operator sa Saudi Airlines sa nasambit nga nasyon nga 12 sandang ginboe-an it swab sample kon sa siin makataliwan ro tatlong adlaw hay nagguwa ro resulta ag napueo sanda nga nagpositibo.
Ginpahayag nga matapos nga masayuran ro resulta it andang COVID-19 test hay ginpasaylo-saylo eon sanda it Villa ukon quarantine facility kon sa siin ro daywang nag negatibo hay ginhalo pa kanda nga mga positibo.
Suno pa kay De Leon, ginadaehan eamang sanda it pagkaon it andang mga kakilaea kon sa siin uwa sanda ginataw-i it inugtaeopangod para madaea sa ospital bangud nga haeos tanan sanda hay may sintomas eon it sakit.
Sa kamatuoran suno kana hay nabudlayan imaw nga magginhawa apang uwa sigon it nagasueang nga ambulansya ag nagakabaeaka eon sanda sa andang kondisyon.
Ginpahayag dugang ni De Leon nga sa sangka kwarto hay an-om sanda nga naga-iba ag gusto eon nanda nga madaea sa ospital para maeapatan it bueong bangud nga nahadlok man sanda nga magpareho sa iba nandang kaibahan nga naging kritikal ro kondisyon.
Ro mga amo sigon nanda nga Arabo hay ginapilit pa nga magtrabaho ro ibang empleyado maskin nasayuran eon nga may sintomas it COVID-19.
