KALIBO, Aklan—Puro pagpasaeamat ro ginpaabot it sangka overseas Filipino worker (OFW) matapos nga eowas nga maka-uli sa nasyon sa bulig it Bombo Radyo Kalibo.
Naging emosyunal ro pagkita it mag-amang Enrique Beltran ag Algien Beltran, OFW halin sa Riyadh, Saudi Arabia nga naka-experiensiya sigon it pagmaltrato ag bukon it tama nga pagsweldo it anang mga amo.
Si Beltran hay nag-agto sa nasambit nga nasyon may sang dag-on ag daywang buean eon ro nagtaliwan.
Nauna eon nga ginpahayag it OFW nga maskin nga nakaangkon it injury matapos nga mahueog sa hagdan ag naninahan it nabasag nga baso hay pilit imaw nga ginapatrabaho.
Maskin sigon ro anang agency nga ginaeauman kara nga magabulig kana hay ginpabay-an eamang imaw ag mas pang nga ginpaboran ro anang mga mapintas nga amo.
Ro pagmaltrato kay Beltran hay ginpaabot it anang pamilya sa Bombo Radyo.
Sa bulig ni Mr. Jack Arroyo it Overseas Workers Welfare Office ukon OWWA Region 6 ag iba pang ahensiya it gobyerno, maayos nga nakauli ro OFW sa Brgy. Libas, Banga, Aklan.
