KALIBO, Aklan—Umabot sa all-time high ko nagtaliwan nga dag-on ro dolyar nga ginpadaea it mga overseas Filipino workers ko nagtaliwan nga dag-on sa redeployment it mga OFW nga nauna eon nga na-displaced tuga it epekto it pandemya, suno kay Bangko Sentral ng Pilipinas (BSP) Governor Benjamin Diokno.
Suno kana nga ro personal remittances hay nagtaas it 5.1 percent sa record high nga $34.88 billion dollars ko 2021 halin sa $33.19 billion dollars ko 2020, eampas sa dating all-time high nga $33.47 billion dollars ko 2019 ukon antes ro pagtama it COVID outbreak.
Ro presenteng growth rate, hay sangkiri nga manaba it 6 percent growth target it BSP.
Gindugang pa ni Diokno nga ro sustained growth sa personal remittances hay tuga it remittances nga ginpadaea it land-based workers nga may work contracts nga sang dag-on ukon masobra pa nga nagtaas it 5.6 percent ukon $27 billion dollars ko nagtaliwan nga dag-on halin sa $25.56 billion dollars ko 2020.
Samtang, ginpahayag pa ni Diokno nga ro remittances halin sa sea- ag land-based workers nga may work contracts it manaba sa sang dag-on hay nagtaas man it 2.9 percent ukon $7.14 billion dollars ko 2021 halin sa $6.93 billion dollars ko 2020.
