Emosyonal nga ginpakigbahin it sangka domestic helper sa Dammam, Saudi Arabia ro anang eksperyensya bilang sangka solo parent nga nakipagsapalaran sa ibang nasyon.
Suno kay Marilou Regino, sangka OFW solo parent, nagdesider imaw nga mag-abroad para sa anang unga. Tatlong dag-on pa eamang sigon ro anang unga kat ana rayang gin-aywan sa pangangalaga it anang mga igmanghod para makipagsapalaran sa ibang nasyon para eon man masuportahan ro mga kinahangeanon it anang unga.
Sa unang kahigayunan nga nag-panaw sigon imaw it nasyon hay makasueubo bangud kinahangean nanang aywanan ra unga biskan raya hay maisot pa eamang. Malisod man sigon bangud uwa nana nakita nga magbahoe ro anang unga ag dugang pa ro pamatyag nga naaalagaan nana ro unga it iba pero ro anang sariling unga hay indi nana matutukan it alaga.
Dugang pa ni Marilou nga para kana ro pagiging nanay hay ro mapabahoe mo ro imong unga, ag ro suporta nga gina tao sa tunga it distansya sa kada isaea.
Handum man sigon nana para sa anang unga nga makatuon gid it mayad, makuhit nana ro mga handum nana sa kabuhi ag maubra nana tanan ro anang gusto.
Suno pa kana nga proud gid imaw sa anang unga bangud gina-balik man nana ro anang mga sakripisyo pinaagi sa pag-eskwela it mayad ag pag-angkon it mga achievements sa anang kabuhi. Pasaeamat man sigon imaw nga nag-abot ro anang unga sa anang kabuhi bangud raya man ro anang ginabue-an it kabaskog adlaw-adlaw.
Mensahe man nana sa mga kapareho nana nga mga solo parents nga nakipagsapalaran sa ibang nasyon para sa pamilya hay padayunon eang ro ginaubra ag magpakatatag, kayanon ro kalisdanan para sa andang unga.
Na-congratulate man sigon nana ro anang sarili bangud bilang sangka solo parents hay nakayanan nana nga magpabahoe it sangka unga biskan uwa imaw it kabulig nga asawa ag proud gid imaw sa anang sarili bangud ubrahon nana ro tanan para sa anang unga.
