KALIBO, Aklan—Nagakasubo makaron ro mga pumueoyo it Kuwait kaibahan ro mga overseas Filipino workers ukon OFW sa pagkamatay it hari nga si Sheikh Sabah Al-Ahmad Al-Jaber Al-Sabah sa edad nga 91 anyos.
Suno kay Bombo International Correspondent Mrs. Rizza Indemne, tubong banwa it Lezo apang presenteng nagatrabaho sa nasambit nga nasyon, tatlong adlaw nga uwa it opisina mapa-publiko ukon pribadong sektor bilang pagpakita it simpatiya sa respetadong hari.
Ginpahayag dugang ni Mrs. Indemne nga makaron nga adlaw magaabot ro bangkay it hari halin sa nasyong America kon sa siin imaw nagpabueong sa anang ginabatyag nga sakit.
Samtang, insigida man raya nga igaeobong bilang pagsunod sa tradisyon it mga Muslim.
Ro nasambit nga hari hay nagserbe sa sueod it 40 anyos bilang foreign minister antes naging prime minister ag ginpangaeanang monarch it nasambitang nasyon.
Ko Agosto 6 hay nagbyahe raya sa US para magpabueong ag gin-operahan pa.
Ginarespeto raya sa nasambitang Gulf state bangud imaw ro nagpatunga sa mga uwa pagkaintindihan it mga nasyong Saudi Arabia, United Arab Emirates, Bahrain ag Egypt.
Nagpaabot man it andang simpatiya ro lider it mga nagkaeain-eain nga nasyon matapos nga mabalitaan ro pagkamatay ni Sheikh Sabah al-Ahmad al-Jaber al-Sabah.
