KALIBO, Aklan—Hugot nga ginbawaean makaron sa Hong Kong ro pagpamasyar sa mga lugar nga ginadayo it maabong tawo kasunod sa nailistang kumpirmadong kaso it Novel-Coronavirus sa rehiyon.
Suno kay Bombo International Correspondent May Farida Yapendon, tubong Banga, Aklan ag presenteng nagatrabaho bilang domestic helper sa Kowloon, Hong Kong, nga hugot nga ginabawaean sa mga overseas Filipino workers (OFW’s), residente ag maging sa mga turista nga mag-adto sa mga matawong lugar agud makalikaw sa 2019 N-CoV.
Bangud kara, limitado ro masadyang pagtililipon it mga OFWs kada dominggo sa Central district area.
Samtang, hugot nga ginamonitor sigon it Hong Kong officials ro mga paeoparan ag pantalan agud masiguro nga uwa it Chinese nga makasueod sa lugar halin sa Wuhan ag Hubei province sa mainland China.
Uwa suno kana it mabakae nga medical mask, alcohol ag grocery items sa mga pharmacy ag supermarkets kasunod it pagpamakyaw it mga pumueoyo sa kabaeaka nga inde eon sanda makaguwa engkasong makaangkon it outbreak sa nasambitang rehiyon.
Maskin sa wet market sigon hay hueoyapon ro nagabaligya it tinuean-on, karne ag isda.
Sa makaron hay nakalista eon it napueong confirmed cases it 2019 N-CoV ro Hong Kong.
