KALIBO, Aklan–Nagapangayo makarun it bulig ro mga overseas Filipino workers sa Thailand agud nga makauli eun it nasyon sa mas madasig nga tiyempo.
Suno kay Bombo International Correspondent Mr. Michael Garulucan it Thailand nga kuwestiyonable para kandang mga ofw nga nagatrabaho sa Thailand ro naging tikang it Philippine embassy idto para sa ginapatigayon nga repatriation it gobyerno.
Maabo sigon kanda ro mga naga-apply it repatriation apang nag-abot eun it pilang buean nga owa sa gihapon sanda it may nabatun nga update angot kara.
Nagdangop man sigon sanda sa Philippine embassy apang gineaygayan eamang sanda nga maghueat bangud maabong nakapila, apang kung gusto sigon it mga rayang makauli eagi hay magbayad eun lang it andang kaugalingon nga ticket.
Nasayuran nga ro na-eksperyensiyahan nga pandemic ro nagtueod sa mga OFW sa Thailand agud nga mag-uli eun lang sa nasyon.
Kaabuan man kanda hay inabot eun it pilang buean ag dag-on nga nadueaan it trabaho bangud sa pandemya.
