Nagakadapat eon nga isuspinde it gobyerno ro Oil Deregulation Law ag Excise Tax sa produktong petrolyo agud nga mabuhinan ro kalisod it tanan nga sektor sa hana nga pagtaas it presyo it langis sa pangkalibutanong merkado tuga gihapon it nagapadayon nga tensyon sa Middle East kasunod it joint combat operation it Estados Unidos ag Israel kontra sa Iran.
Ginpaathag ni Elmer Forro, secretary general it Bayan Panay, sa nasambit nga laye hay ginkakas kara ro kontrol it gobyerno sa pagpresyo, pag-import, ag pagmerkado it langis, nga nagapahanugot sa mga oil cartel nga magtaeana it haega it gasoline samtang ginkakas man ro gahom it Energy Regulatory Board (ERB) nga magtaeana it presyo.
Mag-eowas kara, kinahang-ean man nga usisaon ro mga gahaman nga oil cartel bangud sa gulpihan nga pagpatuman it pagtaas sa presyo it langis nga ginasaligan man nga makaangkon it domino effect sa mga nagapangunang baeak-eon ag pagkaon sa nasyon.
Eubus sanda nga nagakabaeaka sa magiging epekto kara sa mga masunod pang inadlaw eabi eon kon inde matapos ro kinagamo sa nasambit nga nasyon.
