KALIBO, Aklan—Umarangkada eon ro bigtime oil price hike sa haeos tanan nga gasolinahan sa bilog nga probinsya it Aklan makaron nga adlaw it Martes, Marso 8, 2022.
Suno kay Michelle Villaruel, Manager it Phoenix Gasoline Station sa Brgy. Bulwang, Numancia nga naging epektibo ro andang pagpataas sa presyo it petrolyo pasado aalas-6:00 kaina it agahon.
Suno kana, nakaangkon it tatlong piso ag 60 sentimos ro paghueag sa presyo it gasolina samtang limang piso ag 85 sentimos man ro gintaas sa presyo it diesel.
Kaparehong oil price increase sigon ro andang ginpatuman sa tatlong nanda branch patikular eon sa Brgy. Tigayon ag Pook, Kalibo.
Umpisa sigon ko buean it Pebrero hay owa gid sanda nagpatuman it rollback bangud sa sigidas nga pagtaas sa presyo it langis dugangan pa it padayun nga kinagamo sa tunga it Russia ag Ukraine.
Bangud kara, ginaeauman pa ro masunod nga mga pagtaas sa presyo hasta nga indi matapos ro giyera sa tunga it daywang ka mga nasyon.
