KALIBO, Aklan — Padayon ro ginahimong monitoring it Philippine Coast Guard (PCG)-Aklan sa posibleng oil spill sa nag-eogdang nga cargo vessel sa baybayong sakop it Barangay Sambiray, Malay, Aklan ag paadto kunta sa isla it Boracay.
Sa interview it Bombo Radyo, ginpahayag ni Lt. Commander Joe Luis Mercurio, PCG-Aklan commander nga ro Bato Twin Barge nga ginapanag-iyahan it Island Ventures Corporation hay may kargang limang truck it pinong baeas ag sangka loader kat nag-eogdang sa nasambitang lugar.
Nakaeowas man ro kapitan it barko nga si Rolando Casibu kaibahan ro 12 pang mga crew kara.
Ro sakayang pandagat hay naghalin sa Sambiray Port ag paadto kunta sa Manocmanoc Port sa Boracay.
Ginpahayag ni Lt. Commander Mercurio nga ginhampak it mabaskog nga baeod ro barko ag nabasa ro mga baeas nga kapin pang nagpabug-at sa karga kara.
Apang, ginpamalibaran it PCG ro anggulong overloading.
Ginabantayan sigon nanda ro lugar sakay it andang bag-ong barko halin sa France nga BRP-Boracay.
Mag-eowas kara, haom man ro andang mga gamit kaparehas it fence boom ag dispersants engkasong makaangkon it pagtagas it langis.
Sa makaron hay nakipag-angot eon sanda sa tag-iya it barko sa pag-salba sa pilang parte kara agud inde makasagabal sa pag-eayag it iba pang sakayang pandagat nga naga-eayag sa lugar.
