KALIBO, Aklan—Makabig nga mabahoe nga salot para sa mga pomoeuyo sa Southern part it California, USA ro natabo nga oil spill sa daywang ka mga bantog nga beaches idto.
Suno kay Bombo International Correspondent Greg Aguilar in California, USA nga nakatao it kasamaran sa ecosystem it lugar ro insidente kamana man sa mga residente, pomoeuyo ag mangingisda matapos ro maeapnagon nga pagkalhit it langis nga nagresulta sa temporaryong pagbawae sa pagbisita sa mga apektadong lugar.
Ginapatihan nga maghalin ro nasambitan nga langis sa submarine underwater pipeline nga nagkalhit sa Huntington beach ag Newport beach.
Samtang, ginaeauman nga maga-abot pa it hasta an-om nga buean ro pagahimuon nga paglimpyo agud uman nga maibalik sa normal ro operasyon it mga negosyo meapit sa nasambitan nga lugar.
Samtang sa pihak nga parte, ginpahayag man ni Bombo International Correspondent Greg Aguilar it California, USA nga sa makarun hay naging maayos eun ro sitwasyon it estado it California sa Amerika pag-abot sa mga kaso it coronavirus disease ukon COVID-19.
Dugang pa kara nga sa makarun hay maeapit eun lang nanda nga maabot ro ginatawag mga herd immunity.
Buot hambaeon eamang kara nga manami ro naging resulta it covid-19 vaccination sa nasambitan nga lugar.
May kaangtanan kara, amat-amat eun man sigon nga nagabalik sa normal ro andang pagpangabuhi.
