KALIBO, Aklan—Nabatyagan eon ro Olympic fever sa Japan matapos nga mag-aeabutan eon ro mga delegado it nagkaeain-eain nga nasyon nga magapasakop sa Tokyo games nga nauna eon nga na-postponed ko nagtaliwan nga dag-on tuga it COVID-19 pandemic.
Suno kay Bombo International Correspondent Johnny Sato Gallos it Japan nga haeos preparado eon ro tanan sa pormal nga pagbukas it olimpiyada sa Hulyo 23 nga magabuhay hasta sa Agosto 8.
Sa pihak suno kana nga maabu nga mga pumuueuy sa japan ro naga oponer sa pagpatigayun it hinampang, apang sa pag-aeabutan it mga dumueuong nga atleta eakip ro delegado it pilipinas kamana man ro mga Olympic officials hay mahambae nga owa eon raya it atrasan.
Gindugang pa ni Gallos nga maabu nga mga restrictions ro ginapatuman it mga organizers agud nga masiguro nga ro Tokyo Games 2020 hay eowas.
Haeos tanan nga mga participants nga magatinir sa Olympic Village hay bakunado ag bawae nga makipaghalubilo ro mga atleta sa publiko eabi eon sa mga Japanese.
Mag-eowas kara , haeos adlaw adlaw man ro swab testing it mga delegado.
Ro venue man it hinampang hay haeos nakakalhit sa nagkaeain-eain nga lugar ag bukon eamang it concentrated sa sangka lugar.
Magabuhay man suno kana hasta sa Agosto 23 ro gindeklarang state of emergency sa japan sa tuyo nga malikawan ro pagguwa it mga tawo.
Gintaeana sigon it mga opisyal ro opening bandang alas-11 it gabi-i agud nga owa eon ro bulto it mga tawo sa karsada.
Owa man ginpasugtan ro mga domestic spectators kamana man ro mga overseas fans rason nga maabu nga mga gin refund nga plane ticket.
Kaibahan man sa mga ginapasueod hay ro mga katapo it media.
Sa makaron hay naga abot eon suno kana sa 68 nga atleta ro nagpositibo sa covid 19 matapos nga gina-require kanda ro RT-PCR test sa pag abot pa eamang sa airport.
Sa pihak nga parte, ro olympic dome suno kana nga may capacity nga 65,000 hay 5,000 eamang ro ginapasugtan nga makasueod.
