KALIBO, Aklan—Nagbukas makaron nga adlaw it Miyerkules ro One-Stop-Shop Caravan it Aklan Police Provincial Office ukon APPO sa ABL Sports and Cultural Complex sa Capitol Site, Kalibo agud nga indi eon mabudlayan ro mga nagapalisensya ukon maga-renew it lisensya nga mga indibidwal nga may mga baril.
Suno kay P/Major Jake Barila nga sang adlaw eamang ro pagpatigayon it License to Own and Possess Firearms ukon LTOPF Caravan sa banwa it kalibo ag hin-aga nga adlaw it Huwebes hay sa banwa it Nabas.
Tuyo sigon kara nga mataw-an it kahigayunan ro mga pulis ag sibilyan nga makabo-oe kara nga indi eon mag-agto sa Kampo Krame.
Ginpaathag nana nga sa idaeum it RA 10591, indi eamang dapat magbo-oe it lisenya ukon mag renew ro mga nagapanag-iya it baril, kundi dapat man nga ipa-rehistro ro andang baril.
Ro lisenya sigon hay may expiration nga daywang dag-on samtang ro registration it baril hay may expiration nga ap-at nga dag-on.
Suno pa kay Major Barila nga ro mga gun holder nga may expired, magapa-transfer ukon magabakae it bag-ong baril ag magabo-oe it permit to carry hay kinahangean anay nga makabo-oe it License to Own Posses Firearms permits.
Ro tawo suno kana ro paga lisensiyahan ag ro baril ro igapa-rehistro rason nga nagakahueugan nga ro sangka gun holder hay dapat nga naga-angkon it lisensya kaibahan ro LTOPF ag fire arms registration.
Ro mga requirements sa pagbo-oe it LTOPF hay neuro- psychiatric clearance, police clearance, NSO birth certificate, drug test, MTC at RTC clearance, finger prints, ballistic examination, gun safety seminar ag RID clearance.
Ro sin-o man sigon nga madakpan nga owa it LTOPF ag permit hay posibleng magapangatubang sa pag-eabag sa illegal possession of firearms ag iba pang penalidad.
Kapin sa 200 nga mga aplikante ro nag avail sa nasambit nga caravan.
