Ginkundina ni House Deputy Speaker Janette Garin ro gina-alegar nga online bullying nga ginahimo it pilang tagasuporta ni Vice President Sara Duterte kontra sa mga House prosecutor nga nagabuyot sa impeachment trial.
Raya hay matapos magkalhit sa social media ro mga post ag memes nga nagabatikos kanday lead prosecutor Rep. Gerville Luistro bangud sa ginasugid nga pagtueo it eaway samtang nagahambae ag prosecution counsel Amando Virgil Ligutan bangud sa pagsinghot samtang nagaplastar it ebidensya.
Suno kay Garin, normal eamang ro mga nasambit nga kondisyon bangud nga posibleng raya hay tuga it dehydration, mahabang paghambae, pag-inom it maintenance medicines, ukon sip-on. Ginpamilit pa nana nga owa it medikal nga basehan ro pagpati nga ro eaway ukon sip-on hay senyales it pagpinuril.
Gin-engganyo ni Garin ro publiko nga likawan ro pagpakalhit it saea nga impormasyon ag sa baylo hay tutukan ro mga ebidensya ag merito it impeachment case.
Samtang, ginpahayag ni House prosecutor ag Manila Rep. Joel Chua nga pisikal nga mabug-at ro pag-atubang sa Senate impeachment court bangud sa stress ag tensyon it mga pagpamati. Ginpakigbahin man nana nga nauna eon sanda nga owa ginpasugtan nga mag-inom it tubi sa session hall, apang ko ulihi hay ginpasugtan man matapos ro suhestiyon ni Sen. Pia Cayetano.
