KALIBO, Aklan—Gin-anunsyo it Civil Service Commission ukon CSC Aklan Field Office nga sarado eon ro pagbaton it mga aplikante nga interesadong magbueo it examination pinaagi man sa online pre-registration para sa August 7, 2022 CSE-PPT kon siin ro appointment kara hay nakataeana sa June 2-3, 2022 sa ABL Sports and Cultural Complex.
Suno kay CSC Aklan provincial director Leo Jamorin, madasig nga naubos ro kapin sa 1,900 slots nga gintaeana para sa probinsya it Aklan bangud sa kaabuon man it mga gustong magbueo it eksaminasyon.
Ginpaathag dugang ni Jamorin nga ro mga nakasueod sa online pre-registration hay makabaton it confirmation sa andang email sa sueod it 24 hasta 72 oras pagkatapos it validation.
Engkaso sigon nga may nabilin pang slots bangud man sa mga nagdoble it bookings hay insigida man nanda raya nga i-anunsyo.
Nasayuran nga dagsa makaron ro nagabueo it nasambit nga eksaminasyon sa kagustuhan man nga makasueod it trabaho sa gobyerno samtang ro iba hay gusto nga maging permanente bangud nga sambilog ro CSC eligibility sa mga requirements agud nga makaangkon it trabaho sa ahensya it gobyerno nga gustong sudlan it sangka aplikante.
