Kasado eon ro online registration assistance system ukon ORAS it Philippine Ports Authority (PPA) para sa mga magabiyahe makaron nga Semana Santa 2026.
Ginbilog it Philippine Ports Authority (PPA) ro ORAS agud nga mapadasig ag mas maging maayos ro pagbakae it ticket it mga walk-in passenger sa pantalan sa bulig it tatlong simpleng pamaagi ro, scan, choose ag reserve.
Kaibahan sa mga rutang sakop it initial implementation it ORAS hay Balanacan Port paagto sa Lucena Port; Batangas Port paagto sa Port of Abra de Ilog; Calapan; Caticlan; Coron/El Nido, Palawan; Odiongan; Puerto Galera; Romblon/Sibuyan/Roxas City, Capiz; Calapan Port paagto Batangas Port; ag Lucena Port paagto sa Port of Balanacan; Masbate; Romblon.
Pinaagi sa pagparehistro sa ORAS, makabaton ro kada pasahero it ORAS pass nga may code nga igapakita sa validation area agud nga mas madasig nga makasueod sa pantalan ag makabakae it andang ticket sa barko.
May mga help desk mnan para sa mga walk-in passengers ukon sa mga senior citizen, person with disability (PWD) nga magabulig agud nga makapa-register sa ORAS kun maga-abot sanda sa pantalan nga owa pa nakabo-oe kara.
Maga-expire ro ORAS pass, tatlong oras bago ro napiling schedule it barko rason nga ginalaygayan ro mga pasahero nga magtaeana it bastante nga tiempo para mag-agto sa pantalan.
Ginklaru it PPA nga indi igapatuman ro ORAS sa mga pantalan kun sa siin ro mga pasahero hay nag-abot nga may ginabuytan eon nga ticket. Indi man raya igapatuman sa mga pantalan nga may mga ticketing booth nga makit-an sa guwa it port area.
Para man sa mga may daeang saeakyan, indi eon kinahangean nga mag-fill out sa ORAS form bangud nga maga-agi sanda sa normal nga proseso it pagpila it saeakyan pasueod it pantalan.
Nagapangunang tuyo it ORAS nga i-regulate ro daeagan it mga pasahero ag mabawasan ro pagdueutdutan sa mga pantalan pinaagi sa pagtau sa publiko it sistema sa pagbo-oe it ticket ag iskedyul it biyahe it barko.
